12-03-2025
خالصہ جنم دن اور ویساکھی میلہ کے انعقاد کے لیے انتظامیہ اجلاس
پردھان پاکستان سکھ گورو دوارہ پر بندھک کمیٹی سردار رمیش سنگھ اروڑہ نے صدارت کی
ضلعی حکومتیں اور متروکہ وقف املاک بورڈ مل کر یاتریوں کی خدمت کے فرائض انجام دیں گے رمیش سنگھ اروڑہ
مندر اور گور و دواروں کی تعمیر و ترقی کے لیے 30 کروڑ کا بجٹ مختص کیا ہے سیکرٹری بورڈ فرید اقبال
سیکورٹی ودیگر انتظامی امور سمیت کسی جانب سے غافل نہیں۔ ایڈیشنل سیکرٹری شرائنز
سکھ یاتری 10 اپریل کو پاکستان آئیں گے وساکھی میلہ کی مرکزی تقریب 14 اپریل کو ہو گی

لاہور ( ) متروکہ وقف املاک بورڈ کے زیر انتظام سکھ مذہب کے 326ویں خالصہ جنم دن اور وساکھی میلہ 2025 کی تقریبات کے انتظامات کے لیے اعلی سطحی اجلاس متروکہ وقف املاک بورڈ ہیڈ آفس میں منعقد ہوا پردھان پاکستان سکھ گوردوارہ پربندھک کمیٹی و صوبائی وزیر سردار رمیش سنگھ اروڑہ نے انتظامی اجلاس کی صدارت کی۔ اجلاس میں ،ایڈیشنل سیکرٹری شرائز سیف اللہ کھوکھر ۔ڈپٹی سیکرٹری شرائنز عمر جاوید اعوان ، سیکورٹی آفیسر شرائنز چوہدری عاصم کے علاوہ پاکستان آرمی ،پولیس ،رینجرز ،مختلف اضلاع کے انتظامی افسران ،لیسکو،کسٹمز ،امیگریشن او دیگر اہم اداروں کے نمائندوں نے شرکت کی ۔اجلاس میں تقریبات کی تیاریوں کا تفصیلی جائزہ لیا گیا۔ سکھ یاتریوں کی آمد اور قیام کے لئے رہائش کی فراہمی، رسومات کی ادائیگی اور اہم امور پر بحث کی گئی۔صوبائی وزیر سردار رمیش سنگھ اروڑہ نے اجلاس کے بعد میڈیا کے نمائندوں سے گفتگو کرتے ہوئے کہا کہ سکھ یاتریوں کو میڈیکل، قیام و طعام،سفری سہولیات فراہم کی جائیں گی اور انہیں فول پروف سیکورٹی فراہم کی جائے گی، تمام متعلقہ وفاقی، صوبائی ادارے، ضلعی حکومتیں متروکہ وقف املاک بورڈ اور پاکستان سکھ گوردوارہ پربندھک کمیٹی کے ساتھ شانہ بشانہ کھڑے ہیں ۔ انہوں نے کہا کہ سکھ یاتریوں کو ہمیشہ پاکستان سے محبت ملتی ہے اور اس مرتبہ بھی وہ اچھی یادوں کے ساتھ واپس جائیں گے۔سیکرٹری بورڈ فرید اقبال نے کہا کہ وفاقی وزارت مذہبی امور و حکومت کے احکامات کی روشنی میں بھارت سمیت دنیا بھر سے آنے والے مہمانوں کی بہترین مہمان نوازی کی جائے گی ۔ اور اسکے لیے ہر ممکن اقدام کیے جائیں گے۔ پاکستان میں مندر اور گور و دواروں کی تزئین و آرائش اور تعمیر کے لیے 30 کروڑ کا بجٹ رکھا گیا ہے ۔ایڈیشنل سیکرٹری شرائنز، سیف اللہ کھوکھرنے اجلاس کو انتظامات کے بارے بریفنگ دی ،انہوںنے کہا کہ ہم سیکورٹی و دیگر انتظامی امور کے حوالے سے کسی جانب سے بھی غافل نہیں ۔خالصہ جنم دن اور وساکھی میلہ کی پاکستان میں تقریبات کے لیے سکھ یاتری 10 اپریل کو واہگہ چیک پوسٹ کے راستے پاکستان پہنچیں گے۔مرکزی تقریب گورودوارہ پنجہ صاحب حسن ابدال میں14 اپریل کو منعقد ہوگی۔

متروکہ وقف املاک بورڈ حکومت پاکستان

کٹاس راج مندر چکوال میں ہندو مذہب کی تقریبات. بھارت سے آئے ہندو یاتریوں نے ” مہا شو راتری”” کی رسومات ادا کیں۔ بعد ازاں متروکہ وقف املاک بورڈ کے زیر اہتما م ہندو یاتریوں کے اعزاز میں تقریب کا انعقاد کیا گیا ۔
تقریب سے خطاب کرتے ہوئے چئیرمن متروکہ وقف املاک بورڈ ڈاکٹر سید عطاء الرحمٰن نے کہا کہ ہندو اور سکھ برادری کی مذہبی عبادت گاہوں کی تزئین و آرائش ڈویلپمنٹ،پروموشن جوش وجذبے سے انجام دے رہے ہیں ۔ تاریخی کٹاس راج مندر کی خوبصورتی میں مزید اضافہ کے لیے ماسٹر پلان تشکیل دیا جا رہا ہے انہوں نے کہا کہ متروکہ وقف املاک بورڈ اقلیتی مذاہب کے افراد کی خدمت اور اور ان کی عبادت گاہوں کا تحفظ اور ان کی دیکھ بھال کے لیے خصوصی اقدامات کرتا ہےوفاقی وزیر چودری سالک حسین نےہندو یاتریوں کے لیے کٹاس راج مندر سے ملحقہ 36 کمروں پر مشتمل رہائشی بلڈنگ کا افتتاح کیا ہے۔ انہوں نے ضلعی انتظامیہ کا بھی شکریہ ادا کیا۔
بھارتی جتھ لیڈر رگو کانت نے کہا کہ پاکستان امن کا گہوارہ ہے. پاکستان اقلیتوں کے لیے انتہائی محفوظ ملک ہے جہاں سے وہ ہمیشہ ڈھیروں پیار اور محبتیں سمیٹ کر جاتے ہیں۔ بھارتی ترلوک چند نے اظہار خیال کرتے ہوئے کہا کہ ہمیں پاکستان آکر بے حد محبت اور پیار ملا ہے،ہمیں یہاں تمام تر سہولیات دی جا رہی ہیں،یہاں ہمار ی مذہبی عبادت گاہوں کی خصوصی دیکھ بھال بھی کی جارہی ہے یا تریوں کے لیے کٹاس راج سے ملحقہ رہائشی کمپلیکس کی تعمیر پر ہم حکومت اور متروکہ وقف ا ملاک بورڈ کے چیئرمین سید عطاء الرحمن کے شکر گزار ہیں۔ ہم بھارت کی مختلف ریاستوں سے آ نے ہیں ہم نے کٹاس راج میں اپنی مذہبی رسومات ادا کیں۔
اس موقع پر ہندو یاتریوں نے پاکستان کو پرُ امن ملک ہے یہاں مذہبی مقامات کا جس طرح تحفظ کیا جا رہا ہے اس پر وہ متروکہ وقف املاک بورڈ اورحکومت پاکستان اور عوام کے شکر گزار ہیں۔انہوں نے کہا کہ ان کے دل میں پاکستان کے لوگوں سے متعلق جو سوچ تھی وہ یہاں سرحد پار کرتے ہی بدل گئی ہے، پاکستانی بہت محبت کرنے والے اور ملنسار لوگ ہیں ۔تقریب میں ایڈیشنل سیکرٹری شرائنز سیف اللہ کھوکھر ،ڈپٹی سیکرٹری جنرل شرائن عمر جاوید عوان،سکیورٹی افیسر عاصم چوہدری ، پی آ ر او غلام محی الدین سمیت دیگر افسران موجود تھے
یاتریوں کی آمد کے موقع پر ضلعی انتظامیہ اور پولیس کی جانب سیکیورٹی کے غیر معمولی انتظامات کیے گئے ۔ متروکہ وقف املاک بورڈ کی جانب سے سٹیٹ آف دی آرٹ رہائشی کمپلیکس میں رہنے اور کھانے پینے کے انتظامات کیے گئے

چیئرمین متروکہ وقف املاک بورڈ ڈاکٹر سید عطاالرحمن کا پاکستان ماڈل ایجوکیشنل انسٹی ٹیویشن فاونڈیشن (PMEIF) کے زیر انتظام جانکی دیوی جمعیت سنگھ میٹرنٹی ہسپتال ایبٹ روڈ کا دورہ ۔ سیکرٹری بور ڈفرید اقبال بھی ان کے ہمراہ موجود تھے چیئرمین بورڈنے لیبارٹری اور مختلف شعبوں کا دورہ کیا ۔
سیکرٹری بورڈ فرید اقبال نے چیئرمین کو ہسپتال میں جاری ترقیاتی کاموں کے بارے بریفنگ دی۔ چیئرمین بورڈ کا کہنا تھا کہ جانکی دیوی ہسپتال کو مزید بہتر اور جدید سہولیات سے آراستہ کیا جا رہا ہے ۔اس موقع پر چیئرمین بورڈ نے ہسپتال میں موجود مریضوں سے سہولیات بارے دریافت کیا ۔ مریضوں نے چیئرمین بورڈ کا شکریہ ادا کیا اور ملنے والی تمام سہولیات سے آگاہ کیا ۔دوسری جانب چیئرمین بورڈ ڈاکٹر سید عطاالرحمن نے حضر ت عائشہ صدیقہ گرلز کالج اور نواز شریف ماڈل ہائی سکول کا دورہ کیا جہاں کالج پرنسپل ڈاکٹر صائمہ مشتاق ، پرنسپل نواز شریف سکول نزہت نزیر نے انکا استقبال کیا ، طالبات نے پھولوں کے گلدستے پیش کیے،اس موقع پر ایڈمن آفیسر (PMEIF) محمد نعیم اور ذیشان رمضان گورسی بھی انکے ہمراہ موجود تھے ۔
چیئرمین بورڈ نے دورہ کے دوران فن خطاطی کے خوبصورت فن پاروں کی نمائش دیکھی یہ فن پاروں کی نمائش کا اہتمام ایک ماہ پر مشتمل اردو اور عربی کیلی گرافی کی ورکشاپ کے اختتام پر کیا گیا تھا ۔چیئرمین بورڈ نے فن پاروں کی نمائش دیکھنے کے بعد اپنے خیالات کا اظہا ر کرتے ہوئے کہا کہ ہماری روایات کو جدید عہد میں متعارف کروانے کے لئے فن خطاطی کو مضبوط کرنا چاہئے۔چیئرمین بورڈنے مختلف کلاس رومز کا دورہ کیا طلبا و اساتذہ سے ملاقات کی اورتعلیمی نصاب کےحوالے سے سوالات بھی پوچھے ۔